طالب الإعلامي الرياضي الأهلاوي، إبراهيم المنيسي، في فيديو تاريخي ناري، إدارة النادي الأهلي بالانسحاب من الدوري، بعد تعادل الفريق أمام سيراميكا كليوباترا، وعدم احتساب حكم المباراة لضربة جزاء واضحة للأهلي في الوقت الضائع، رغم استدعاء حكم الفار له.
وقال المنيسي: "لو لم ينسحب الأهلي من الدوري المشبوه الفاسد، حسابه هيكون كبير في التاريخ..".
وأضاف المنيسي: "هاتكلم للعدالة قبل ما تكون لمصلحة الأهلي أو الجمهور. بطولة بهذا الشكل، فساد بهذا النوع، حكم بهذا الفساد لا يجب التعامل معه على الإطلاق. على الأهلي أن يحترم جمهوره وهيبته وتاريخه".
وهاجم المنيسي حكم المباراة، قائلاً: "وأبسط قواعد العدالة، هذا الحكم الفاسد! لما تبقى الكورة قدام عينيه، واللاعب إيديه مكبر جسمه، وضربة جزاء... الشيخ حسني يحسبها، مش محمود وفا ولا محمود "زفت"!.. والفار يجيبه، محمود عاشور، حكم الفار، الحكم الأول في إفريقيا على الفار، الراجل عمل اللي عليه وقاله: تعالي اتنيل على عينيك شوف الكورة، ركلة جزاء!.. الأخ وفا ولا زفت، مفيش حاجة تمنعه من رؤيتها والكورة قدام عينيه. لما ميحسبهاش، يبقى حكم فاسد، ولا يرقى أن يحط في بوقه صفارة ولا يحكم بين الناس".
وعرج المنيسي إلى من يديرون كرة القدم في مصر، قائلاً: "الأخ أبوريدة، والأخ أحمد دياب، شوفوا لكم حل في منظومة الفساد. ده حكم داخل يودي الدوري في سكة، ده حكم نازل يدوس على الأهلي. أنا شميته من الشوط الأول..".
وعرض المنيسي بعضًا من أخطاء الحكم: "تريزيجيه برة الـ18، مقلع الفانلة، وقدام عين الفاسد محسبهاش!.. كورة ياسر ميقدرش يمنعها شوطة، لكن الكورة واضحة، والحكم الفاسد شايفها قدام عينيه، ميحسبهاش؟!.. لا، ده حكم بلغ درجات الفساد والفضائح، ده ريحته فايحة قوي".
وطالب المنيسي إدارة النادي الأهلي باتخاذ قرار قوي ضد الحكم، قائلاً: "على الأهلي اتخاذ موقف حاد، وأنا بطالبه بسرعة الانسحاب من البطولة. ده مستوى في الكورة والعدالة مينفعش تتعامل معاهم. يقولك لائحة! هتطبق اللائحة والفايحة؟ كرابطة وكزفت! إذا كان يرضيكم ده مستوى تحكيم في بطولة، الأهلي لازم ينسحب. وشريط المباراة يروح للاتحاد الدولي لكرة القدم، ولجنة الحكام في الاتحاد الإفريقي، واللجنة في الفيفا، يقولولهم إن عندنا حكم فاسد يجب بتره..".
وأضاف المنيسي: "كان ممكن نلتمس العذر، يقولك نغنشت عيني بربشت لحظة! طيب يا فاسد، الفار جابك وادالك فرصة تشوف. ليه الإصرار على الغلط؟ إذا كانت الكورة واضحة، والإيد برة الجسم، إيه اللي يمنعك تحسبها غير ضميرك الأسود؟".
"إيه ده بجد؟!.. إيه ده؟!.. التحكيم الإفريقي راح في ستين داهية! شطبوا حكام وودوهم السجن، وقالك الأشكال القذرة متنزلش الملعب تاني. التحكيم الإفريقي اتطهر من البلاوي السودا دي. دوري إيه اللي ينفع فيه ده؟!.. اللوم على الأهلي، رايح يدفع 100 ألف دولار لمباراتي الزمالك وبيراميدز. طيب والبلاوي السودا دي؟!.. حكم خرة فاسد بهذه القيمة، هتعمله إيه؟!.. ده مستوى ضميره عدى المراحل المعفنة دي!".
لازم اتخاذ موقف حاد من البطولة كلها، ويعملوا اللي يعملوه. مش هلعب في الوساخة دي، مش هتعامل بالمستوى المتدني ده، مش هقبل بالرشاوي والفساد ده، مش هقبل توجيه الدوري. ما يتعادل ولا يخسر الأهلي، بس يخسر كورة بنزاهة. لا الدوري هيضيف ولا يقلل من قيمة الأهلي، بس باحترام ونضافة وعدالة. سيراميكا عامل ماتش كويس، مش محتاج حكم فاسد علشان ينقذه.
واستمر المنيسي في هجومه: "عاشور جابك يا فاسد علشان تاخد فرصة تراجع نفسك!.. يحصل اللي حصل ده؟!.. إيه ده بقى؟!.. لو مفيش موقف حاد تجاه البلاوي السودا دي، هيبقى إمتى وفين وليه؟!.. بلا دوري ولا زفت، فضوها سيرة وارحموا نفسكم من الأجواء القذرة دي. ده مش تحكيم ولا عدالة ولا احترام!.. لكن جمهور الأهلي العظيم الجميل، شكرًا، كنت عند المستوى. لاعيبتك لعبوا بروح عالية وضغطوا وحاولوا. والروح دي كنا بنطالب الأهلي بيها. مش القضية إن الأهلي يخسر أو يتعادل أو يفقد دوري، القضية إن الأهلي يسكت على تعاملات قذرة في تحكيم فاسد، مع حكم فاسد بهذا المستوى... ألا هل بلغت، اللهم فاشهد".